കളഞ്ഞു പോയതോ
കളവു പോയതോ
കാണാതായതോ
എന്തോ ഒന്നുണ്ട്
************
മായ്ച്ച് മായ്ച്ച്
തെളിഞ്ഞു വരുന്ന
ചില ചിത്രങ്ങളുണ്ട്
************
ഒരു പുഞ്ചിരിയാല്‍
വീണ്ടെടുക്കുന്ന
ഓര്‍മച്ചിത്രങ്ങളുണ്ട്
************
മറവിയിലുറങ്ങി
ഓര്‍മയിലേക്ക് ഉണരുന്നു
എന്റെ നിന്റെ കനവുകള്‍
************
ഞാനുറങ്ങുമ്പോഴെല്ലാം
നീ ഉണര്‍ന്നിരിക്കുന്നതിനാല്‍
എന്റെ സ്വപ്നത്തിന്
നിന്റെ സ്വപ്നത്തിലേക്ക്
വരാനാവുന്നേയില്ല...!!!
************
ഈരണ്ടു ജാലകങ്ങള്‍ മാത്രമുള്ള
ബോഗികള്‍ ഘടിപ്പിച്ച തീവണ്ടി
************
ഒരു രേഖാചിത്ര വിദഗ്ദനും
എന്നില്‍ നിന്നും
വരച്ചെടുക്കാന്‍ കഴിയാത്ത
നീയൊരു മായ തന്നെ..!!
************
എനിക്കൊരു ഹൃദയത്തോളം
തൂക്കം കുറഞ്ഞിട്ടുണ്ട്
നിനക്കാ ഹൃദയത്തോളം
തൂക്കം കൂടിക്കാണും..!!
************
അതിനുമാത്രം എന്താണെന്നോ..?
നിന്നെ പോലെ എനിക്ക്
മറ്റൊരു നീയോ
എന്നെ പോലെ നിനക്ക് ...
മറ്റൊരു ഞാനോ ഇല്ല എന്നത് തന്നെ
************
ഉത്തരം പറഞ്ഞാല്‍
പരാജയപ്പെടുന്ന ചോദ്യങ്ങള്‍
അഥവാ എനിക്കുത്തരം മുട്ടുന്ന
നിന്റെ ചോദ്യങ്ങള്‍
************
നിശ്ശബ്ദതയുടെ പാതിരാ പക്ഷികള്‍
പകല്‍കിനാക്കളിലേക്ക് ചിറകടിക്കുന്നു
************
മിന്നാമിനുങ്ങുകള്‍
...................................
പ്രണയ ചുംബനങ്ങളുടെ
കടലാസുപൊതികള്‍
ആകാശത്തേക്കാരോ ...
വലിച്ചെറിഞ്ഞതാവാം
അവയ്ക്ക് ജീവന്‍ വെച്ച്
തെളിഞ്ഞും അണഞ്ഞും
ചെറു ചിറകില്‍ പറന്നും
കൊതിപ്പിക്കുന്നതുമാവാം
************
മഴവിരി ജാലകത്തിനിപ്പുറം
ഓര്‍മകള്‍ പുതച്ചുറങ്ങുന്നു
നീ എന്ന ഋതുവരുന്നതും
കാത്ത് കാത്തൊരു പൂമരം
************
ഇനിയും വരാനില്ലാത്ത
വസന്തം കാത്തിരിക്കുന്നു
ഇല കൊഴിഞ്ഞ്
കൊഴിഞ്ഞുണങ്ങിയ മരം
************
പെയ്തിട്ടും പെയ്തിട്ടും
ബാക്കിയാവുന്ന
കറുത്ത മേഘമാവുന്നു
വേദനകള്‍
************
രാത്രിയുടെ യാമങ്ങളില്‍
ഓരോ സ്വപ്നങ്ങളെ വീതം
കൊളുത്തി വെക്കുന്നതും
നിദ്രയെ എടുത്ത് പോവുന്നതും
നിന്റെ പതിവായിരിക്കുന്നു..!!
************
ഓര്‍മകളുടെ ഇഴയകലങ്ങള്‍
വേദന നൂലുകൊണ്ട് തുന്നുന്നു
************
മഴ ഞാന്‍ അറിഞ്ഞതേയില്ല
ഞാന്‍ നീ നിര്‍ത്തിപ്പോയ
വെള്ളച്ചാട്ടത്തിനടിയിലാണല്ലോ..!!
No comments:
Post a Comment