ഭ്രാന്തുകള്‍ പൂക്കാത്ത ഒറ്റമരം ..!!
**********
എന്റെ
വേദനക്കുഞ്ഞുങ്ങളെ
തിരികേയേല്‍പ്പിക്കുകയെന്‍
തിരുമുറിവുകളേ...!!
**********
എവിടെയോ
ഒരു കുഞ്ഞില മറവില്‍
വിരഹത്തിലേക്ക് പായും ഞരമ്പില്‍
ഒരു വിഷാദ തുഷാരബിന്ദുവായി
ഞാന്‍ തിരഞ്ഞിട്ടും കാണാതെ...
നീയുണ്ടാവും.. !!
**********
അകത്ത് കിനാവുകള്‍ പൂക്കുമ്പോള്‍
പുറത്ത് നമ്മള്‍ ഇരുട്ടറയിലായാലെന്ത്..!!
**********
ഇനി നമുക്ക് മിണ്ടാതിരിക്കാം
എന്ന് നമ്മള്‍ കരുതുന്നത് മുതല്‍ക്കാവും
നമ്മള്‍ നമ്മളോട് തന്നെ
മിണ്ടിക്കൊണ്ടേയിരിക്കുന്നത്..!!
**********
വിഷാദങ്ങളുടെ ധാന്യമണികള്‍
ഹൃദയത്തിന്‍റെ മുറ്റത്ത് നിന്നും
കൊത്തിപ്പെറുക്കാന്‍
എല്ലാ ഹൃദയങ്ങളിലും
ഒരു മൈന കൂട് വെച്ചിട്ടുണ്ട്
**********
ഇടയ്ക്ക് സമയം
എന്നെ വിട്ട് പോവും
അങ്ങിനെ സമയം പോവുമ്പോഴെല്ലാം
ഞാന്‍ നിന്റെ അടുത്തായിരിക്കും
പിന്നീടെപ്പോഴോ കയറിവരും...
എന്റെ ബാഹ്യലോകത്തെ
സമയങ്ങളെല്ലാം നീ എന്നാണെനിക്ക്
തിരിച്ച് തരിക..!!
**********
ഹൃദയത്തില്‍ നീയെന്ന
ഒരു മുറിവരുവിയുണ്ട്
ഓര്‍മകളുടെ വേദനകള്‍ ഒഴുകുന്നത്
**********
പേനനിറയുന്ന മഷിയും...
രൂപമാറ്റം വരുന്ന അക്ഷരങ്ങളും
നീയല്ലാതെ മറ്റൊന്നല്ല..!!
**********
നീ,
നിലാവ് നിറച്ച
പേനകൊണ്ടെഴുതിയ കവിത
**********
ഉടലുടയാട തീര്‍ത്ത
അനുരാഗമേ
നീ പോയതില്‍ പിന്നെ ഞാന്‍
വിരഹത്തിന്‍റെ
ഒറ്റക്കൊമ്പില്‍...
വിഷാദത്തിന്റെ
ഒരിലമറയത്തിരിക്കുന്നു.
**********
നീ വറ്റി വേനലായ
എന്റെആത്മാവിലേക്ക്
ഒരു തുള്ളി ചാറുക
കടലോളം കുടിച്ച് ഞാന്‍
ദാഹം ശമിപ്പിക്കട്ടെ
**********
ഉറക്കത്തിന് മുന്‍പുള്ള
ചിന്തകളിലോ
വെറുതെ ഒരു കിനാവിലോ
നീ ഇപ്പോള്‍ വരുന്നേയില്ല...
എന്നിട്ടും എങ്ങിനെയാണ്
നീയെന്‍റെ കൂടെ
എപ്പോഴും ഉണരുന്നത്..!!
**********
ഞാനെന്നെ മറന്ന് പോവുന്നു..!!
**********
നീ എന്നില്‍ നിന്നും
അകന്നുപോയെന്ന് പറയുന്ന
അത്രയ്ക്കും ദൂരങ്ങള്‍ക്കിടയില്‍
ഒരു ശൂന്യതയുടെ വയലുണ്ട്
അവിടെയാണ് ...
എന്റെ കാത്തിരിപ്പിന്‍റെ
വയലറ്റ് പൂക്കള്‍ വിരിയുന്നത്
**********
നീ കടല്‍
ഞാന്‍ കപ്പല്‍
നിന്റെ ഭാവവ്യത്യാസങ്ങളിലൂടെ
യാത്ര ചയ്യുന്നു..
**********
നീ,
എത്ര നനഞ്ഞാലും
മതിവരാത്ത മഴ/മൊഴി.
**********
നിഴലനക്കങ്ങളില്‍ പോലും
കാന്തിക തരംഗങ്ങള്‍ തീര്‍ത്ത്
എന്നെ അതിചാലകമാക്കുന്നു നീ
**********
നിന്നെ മാത്രം
കാത്തിരിക്കുന്നു
എന്റെ ജാലകങ്ങള്‍
എന്നിലേക്ക് മാത്രം ...
തുറക്കാതെ വെച്ചിരിക്കുന്നു
നിന്റെ ജാലകങ്ങള്‍
**********
നീ എന്നെ മറന്നുപോയ
അത്രയ്ക്കുമത്രയ്ക്കും
ഞാന്‍ നിന്നെ
ഓര്‍ത്ത്കൊണ്ടേയിരിക്കുന്നു
No comments:
Post a Comment