പ്രണയം കൊടുത്ത് മൌനം വാങ്ങുന്ന ആഗസ്ത്

സങ്കടങ്ങളെയെല്ലാം
തേവി വറ്റിക്കുന്നു
നിനക്കൊരു കുഞ്ഞ്
സന്തോഷപ്പൊന്ന് തരാന്‍
                  ************
എണ്ണിയാല്‍ തീരാത്ത
ബോഗികളുള്ള
നിന്റെ ഓര്‍മകളുടെ വണ്ടി
പോയിത്തീരാന്‍ കാത്തിരിക്കുന്നു
എനിക്കെന്നിലേക്ക്...
പാളം മുറിച്ച് കടക്കാന്‍
                  ************
എന്റെ
വിരഹോഷ്ണത്തീ തുള്ളിയില്‍
നിന്റെ പേര് കൊത്തിവെയ്ക്കുന്നു
കാറ്റിന്റെ ഇരു ചിറകുകള്‍
അതിന് തുന്നിച്ചേര്‍ക്കുന്നു...
                  ************
എന്റെ സങ്കടങ്ങള്‍
ആകാശം തൊടുന്ന മുനമ്പില്‍ നിന്ന്
നീയെന്ന വേര്‍പാടിലേക്ക്
ഞാനതിനെ പറത്തുന്നു
                  ************
ദിനേനയിങ്ങിനെ
പെയ്തിട്ടും പെയ്തിട്ടും
പൂ തീരാതെ
ഓര്‍മകളുടെ ഒരു പൂമരം
                  ************
എത്ര കുടഞ്ഞെറിഞ്ഞാലും
അടര്‍ന്ന് പോവാത്തതെന്തോ..!!
                  ************
ഓര്‍ക്കാതിരിക്കാന്‍
മറന്നുപോവുന്നു..!!
                  ************
അണയാതിരിക്കാന്‍ മാത്രം
ഏത് ഇന്ധനം ചേര്‍ത്താണ്
നീയെന്നില്‍ തീയിട്ട് പോയത്..!!
                  ************
ഒരേ പോലെ വേറെ
ഒരെണ്ണം പോലുമില്ല..!!
                  ************
പലപ്പോഴായി
ഇനി നിന്നെ കാണേണ്ടെന്ന്
ഇനി മിണ്ടേണ്ടെന്ന്
ഇനി ഓര്‍ക്കേണ്ടെന്ന്
ഇനി കാത്ത് നില്‍ക്കേണ്ടെന്ന്...
നിമിഷങ്ങളോളം പോലും
നീണ്ടു നില്‍ക്കാത്ത
ശപഥമെടുക്കുന്നു ഞാന്‍..!!
                  ************
പകരുന്ന പാത്രത്തിന്‍റെ രൂപത്തിലേക്ക്
പരിവര്‍ത്തനം ചെയ്യത്തക്ക രീതിയില്‍
നീയെന്നെ എപ്പോഴാണ് ഉരുക്കിയെടുത്തത്..!!
                  ************
ഇറങ്ങിപ്പോവുമ്പോഴെല്ലാം
നീ കൂടെ കൊണ്ട് പോവാന്‍ മറക്കുന്ന
ഒരു നീയെപ്പോഴും
എന്നില്‍ ബാക്കിയാവുന്നു
                  ************
വിരസതയുടെ കൂടയെടുത്ത്
കവിതകള്‍ കൊഴിയുന്ന
ഒരൊറ്റമരച്ചുവട്ടിലിരിക്കാന്‍ മോഹം..!!
                  ************
കാണുന്നവരിലെല്ലാം നിന്റെ
പ്രതിച്ഛായ കൊത്തിയിടുന്നതാരാണ്
                  ************
മനസ്സ് വേദനയ്ക് തേയ്ക്കാവുന്ന
മരുന്നുകള്‍ ലഭ്യമായെങ്കില്‍..!!
                  ************
നിന്നെ കാണാന്‍ സാധ്യതയുള്ള
വഴികളിലെന്റെ ചങ്കിടിപ്പ് കൂടുന്നു
അത്രയും കാണാന്‍ തോന്നിയിട്ടും
നിന്നെ കാണാതിരിക്കാന്‍ ആഗ്രഹിക്കുന്നു
                  ************
കണ്‍പോളകളില്‍ എവിടെയോ ആവണം
നീ താമസിക്കുന്നത്
അവ അടയ്കുമ്പോഴും തുറക്കുമ്പോഴും
നീ ഇറങ്ങി വരുന്നല്ലോ..!!
                  ************
എത്ര പുഴകളില്‍ നീന്തി വന്നാലും
എന്റെ കടലേ, നീയുപ്പിക്കുന്നു..!!
                  ************
ഞാനറിയാതെ നിന്നെ ഒളിച്ച് കടത്തി
ആരോ എന്നില്‍ സൂക്ഷിച്ചിട്ടുണ്ട്..!!
                  ************
കിനാവില്‍ വന്നിനിയെന്നെ
നീ ഉമ്മവെയ്ക്കരുത്
ഉണരുമ്പോള്‍
ഉമ്മകളാകെ പൊള്ളുന്നു..!!
                  ************
ചെടികള്‍ പ്രകാശം കിട്ടുന്ന
ഭാഗത്തേക്ക് ചായുന്നു
എത്ര തന്നെ പ്രകാശം ലഭിച്ചിട്ടും
ഞാന്‍ നീയില്ലായ്മയിലേക്ക് ചായുന്നു..!!
                  ************
നികത്താനാവാത്ത ശൂന്യതയാണ് പ്രണയം..!!
                  ************
നിന്നെ കാണാതിരിക്കാന്‍ ഒളിയിടങ്ങളില്ല..!!
                  ************
വേദനകള്‍ പൂക്കുന്ന ഒരൊറ്റമരം
                  ************
പ്രണയം കൊടുത്ത് മൌനം വാങ്ങുന്നവര്‍