നോക്കിയിരിക്കേ
അപ്രത്യക്ഷമാവുന്ന
കണ്മിഴിക്കനവുകള്‍ ..!!
**********
ഇവിടെയീ ഒറ്റമരക്കൊമ്പില്‍
നിന്നെ നിനച്ചിരിക്കുവോളം
ഞാന്‍ ഒറ്റയല്ലാതൊറ്റയാവുന്നു
**********
ഞാന്‍
പരാജയം സമ്മതിക്കുന്ന
ഏക ഇടമാണ് നീ
**********
തൊടിയിലിത്തിരി വട്ടം കറങ്ങി
എന്നെ തൊടാതെ പോവുന്ന കാറ്റേ,
നിന്നില്‍ നിന്നൊരു തുള്ളി തെറിച്ചെന്റെ
ഉള്ളം പൊള്ളി പൊള്ളിയടരുന്നു
**********
ഇപ്പോഴും
ഞാനിവിടെത്തന്നെയുണ്ട്
നീ പറഞ്ഞ് വെച്ച വാക്കിന്‍റെ
തുമ്പില്‍
**********
ഞാന്‍, ഒരു ശലഭജന്മം
നീ എന്ന വസന്തം വരായ്കയാല്‍
ചിറകുകള്‍ മുളയ്ക്കാതെ
സമാധിയില്‍ തപസ്സ് ചെയ്യുന്നു
**********
ഒരു തരി കുശുമ്പില്‍
ഒരായിരം സ്നേഹം
**********
ഉണങ്ങരുത്
എന്ന് നോവുന്ന
മുറിവുകളിലെല്ലാം
നിന്നെ
തുന്നിച്ചേര്‍ത്തിരിക്കുന്നു
**********
നീ മഴയാണ്
ഇടയ്ക്കെപ്പോഴോ
തോര്‍ന്ന് പോവുന്നത്
പിന്നെയും ...
മടിച്ച് മടിച്ചൊടുവില്‍
അത്രയും ആയത്തില്‍ പെയ്യുന്നത്
**********
കൊത്തിയെടുക്കാനെത്ര
കഴുകൻ, പരുന്തുകൾ
വട്ടമിടുന്നെന്റെ പ്രണയമേ
ഒരു കൊക്കിനുമിരയാവല്ലേ
എന്നുയിരുകാത്തിടാന്‍...!!!
**********
നിന്നെ നിന്നെക്കാള്‍ എനിക്കും
എന്നെ എന്നെക്കാള്‍ നിനക്കും
അറിയാം എന്നുള്ളതാണ്
**********
നീ, ഒരായിരം ഹൃദയചിഹ്നങ്ങള്‍ കൊണ്ട് പോലും
ആലേഖനം ചെയ്യപ്പെടാനാവാത്ത പ്രണയമാണ്
**********
നീ കരഞ്ഞ് മഴയാവുന്നു
ഒഴുകി പുഴയാവുന്നു
ഉപ്പിച്ച് കടലാവുന്നു
ഉഷ്ണിച്ച് മേഘമാവുന്നു...
**********
പരിണാമ ചക്രങ്ങളിലെല്ലാം
ഞാന്‍ നിന്റെ മാത്രം പ്രണയമാവുന്നു
**********
നിന്റെ മുറിവുകൾ
നിന്നേക്കാളേറെ
എനിക്ക് മുറിയുന്നതിനാൽ
നിനക്കവ ഉണങ്ങിയിട്ടും
എനിക്കിപ്പോഴും ...
വേദനിച്ച്കൊണ്ടിരിക്കുന്നു..
**********
എനിക്ക്
നീ എന്നൊരു
നിഴലോര്‍മ മാത്രം മതി
**********
എന്നെ മാത്രം
കാത്തിരിക്കാത്ത
ഒറ്റമഴച്ചില്ലകള്‍
**********
ഓര്‍മകളിലേക്ക്
ആത്മാഹുതി ചെയ്യുന്ന
ഒറ്റത്തുള്ളി മഴകള്‍
**********
ഇനി കാത്തിരിക്കാനൊരു
മരച്ചില്ല പോലുമില്ലാത്തതിനാല്‍
കാടിനൊപ്പം ഞാനും തീപെടുന്നു
**********
പെട്ടെന്ന് മുറിച്ചു മാറ്റാന്‍ പറ്റുന്ന
അത്രയും മൃദുവായ സ്നേഹങ്ങളാവും
എന്നുമാദ്യം അടര്‍ത്തിമാറ്റപ്പെടുന്നത്
**********
സ്ഫോടനാത്മകമായൊരു
സ്നേഹത്തെ തിരിതാഴ്ത്തി വെച്ചിരിക്കുന്നു
No comments:
Post a Comment