ആ ഉമ്മകളൊക്കെ
നീ എവിടെയാണ്
ഉപേക്ഷിച്ചത്..!!
---------------
ആ കിനാവിന്‍
പാതയോരത്ത്
ആരെയോ
കാത്തെന്നപോല്‍
നില്‍പ്പവളേ...!!
----------------------
ഉറക്കത്തിന്‍റെ താഴിടാന്‍
മറക്കുന്ന രാത്രിയിലാവണം
നീ സ്വപ്നത്തിലേക്ക്
ഇറങ്ങിപ്പോവുന്നത്..!!
---------------------
അത്രയേറെ തമ്മിലടുത്ത്
പിരിഞ്ഞവര്‍ കണ്ടുമുട്ടുമ്പോള്‍
അത്രയേറെ അപരിചിതരാവുന്നു
അദൃശ്യ തരംഗങ്ങളില്‍
അറിയാതെ തടഞ്ഞവര്‍ ...
രണ്ട് ആഘാതങ്ങളാവുന്നു
------------------------------
കടലെല്ലാം
ആകാശത്തേക്ക് കയറിപ്പോവുകയും
ആകാശം
താഴേക്കിറങ്ങുകയും ചെയ്ത
സ്വപ്നത്തില്‍ ...
നമുക്ക്
രണ്ട് ചിറകുകള്‍ ഉണ്ടായിരുന്നു..!!
----------------------------------
വാക്കുകള്‍ക്കിടയില്‍
നിന്നൂര്‍ന്ന് പോയ
രണ്ട് ചുംബനങ്ങളാണ് നാം..!!
------------------------------
എഴുതിയെഴുതി
ഇപ്പോള്‍ എനിക്ക്
നിന്‍റെ വാ/നാക്കായി..!!
---------------------------
ഇനി കാണേണ്ടെന്ന്
മിണ്ടുകയേ വേണ്ടെന്ന്
അത്രയും മടുത്തെന്ന്
ഇഷ്ടം പറഞ്ഞിട്ടെത്രയായി.!!
-------------------------------
കടലിന്‍റെ അടിത്തട്ടോളം
ആകാശത്തിന്‍റെ അതിരുകളോളം
കൊടുമുടിയുടെ മുനമ്പോളം
നീ വരുകില്‍ നമുക്ക് പോവാം..!!
---------------------------------
പഴകും തോറും
വീര്യം കൂടുന്ന വീഞ്ഞുപോലെ
ഹൃദയത്തില്‍ കുഴിച്ചിട്ടിരിക്കുന്നു
ഞാനെന്റെ പ്രണയം
---------------------------------
നിനക്കും എനിക്കും
മാത്രം ഇടമുള്ളൊരു വീട്
നമ്മുടെ നിശ്വാസങ്ങള്‍ ജാലകങ്ങള്‍
നമ്മുടെ കണ്ണുകള്‍ വിളക്കുകള്‍
നമ്മുടെ കരള്‍ തുടിപ്പത്രേ സംഗീതം...
ചുംബനപ്പൂക്കള്‍ കൊണ്ടൊരു മെത്തയും
-----------------------------------
എത്രതവണ നീയെന്നെ
വഴിയിലുപേക്ഷിച്ചതാണ്
പിന്നെയും പിന്നെയും
ഞാന്‍ നിന്നെ തിരഞ്ഞ്
വന്നപ്പോഴൊക്കെയും...
ഞാന്‍ നിന്‍റെ
അരികിലുണ്ടായിരുന്നു..!!
---------------------------
ഞാന്‍ നിനക്ക്
ഉമ്മവെച്ചയച്ചിരുന്ന
നീ തുറക്കാത്ത കത്തുകള്‍
ഹൃദയത്തിന്റെ ഏതറയിലാണ്
നീ ഉപേക്ഷിച്ചത്..!!
--------------------
ആത്മഹത്യാ മുനമ്പില്‍ നിന്ന്
താഴ്വരയിലേക്ക് ചാടി
ജീവത്യാഗം ചെയ്ത പ്രണയമേ
മരിക്കാന്‍ തയ്യാറാവാതെ
താഴ്വരക്കാറ്റായി ...
നീ ഇനിയുമെത്രനാള്‍ വീശും
No comments:
Post a Comment