നീ ഒരു രാജ്യമാണ്

നീ ഒരു രാജ്യമാണ്
ഞാന്‍ അതില്‍
നിധി തേടി അലയുന്ന
സഞ്ചാരിയും..!!
--------------------
എന്തോ എപ്പോഴും
നിന്നോട് പറയാന്‍
ബാക്കി വെയ്ക്കുന്നു..!!
-------------------------
പറഞ്ഞും പറഞ്ഞും
തീരാത്തത്
കേട്ടും കേട്ടും
മതിവരാത്തത്
-------------------

നീ ഒരു മഞ്ഞുതുള്ളി
എന്റെ ഉടലാകെ
ശിശിരകാലം പുതയ്ക്കുന്നു
നീ ഒരു പൂമ്പൊടി...
എന്റെ സിരകള്‍ തോറും
വസന്തം നടുന്നു

നീ ഒരു വേനല്‍
എന്റെ ഹൃദയമാകെ
ഗ്രീഷ്മകാലത്തീ പടര്‍ത്തുന്നു
നീ ഒരു വിഷാദം
എന്റെ ചിന്തയാകെ
ശരത്കാലമേഘമാക്കുന്നു
---------------------
അന്ന്
നിനക്ക് മുറിഞ്ഞപ്പോള്‍
എനിക്ക് വേദനിച്ചതാണ്
ഇന്നും
നമുക്ക് മധുരിക്കുന്നത്..!
----------------------
നിന്നെകുറിച്ചെഴുതി
പ്രസിദ്ധപ്പെടുത്താത്ത
നോവുകളുടെ വരികളാണ്
എന്റെ ഹൃദയ അറകളിലെ
അലമാരയിലെ പുസ്തകങ്ങള്‍
----------------------------
നിന്റെ ഓര്‍മകളെ
ഉരുക്കിയുരുക്കി
ഒരിക്കലും വറ്റാത്ത
ഒരു കുപ്പി മഷിയാക്കി ഞാന്‍
നിന്റെ ഓര്‍മകള്‍ മാത്രം ...
കുടിച്ച് ജീവിക്കുന്നൊരു
പേനയായി ഞാന്‍
നിന്നെ പാനം ചെയ്ത്
മിഴിയൊഴുകുമ്പോഴാണ്‌
കവിതകള്‍ വരയ്ക്കപ്പെടുന്നത്
------------------------------------
നിന്‍റെ ഒരു വാക്കെങ്കിലും
കൊറിക്കാതെയുറങ്ങുന്ന
രാത്രികള്‍ അത്താഴപ്പട്ടിണിയിലാവും
-------------------------------
ഒരു തുള്ളി പ്രണയ ചഷകത്തിലുണ്ട്
ഒരായിരം കോപ്പ വീഞ്ഞിന്റെ ലഹരി
------------------------------
ആകാശം ചായ്ചുകെട്ടിയിട്ടുണ്ട്
നീ പെയ്യുമ്പോഴൊരുതുള്ളി-
പോലും ചോരാതിരിക്കാന്‍..
------------------------------
സ്വപ്നത്തില്‍ നീയെന്നെ
ഉമ്മ വെയ്ക്കുമ്പോഴെല്ലാം
എന്റെ ആത്മാവ് പിടയുന്നു
ഞാനുണര്‍ന്ന് എന്നെ തിരയുന്നു..!!
---------------------
ഒരു കിനാവുണ്ട്,
പറഞ്ഞാല്‍
പുലരാതെ പോവുമോ
എന്ന് പറയാതെ വെച്ചത്
------------------------
കിനാവെഴുതുന്ന
മഷി ഏതാവും.!!
അത്രയും തെളിഞ്ഞ്
മാഞ്ഞ് പോവുന്നത്..!!
------------------------
നീ ഒരതിചാലക
ഞാനൊരു വൈദ്യുത പ്രവാഹവും..!!
----------------------------------
നമ്മളറിയാതെ ഒഴുകിപ്പോവുന്ന കപ്പല്‍..!!