വരും കാറ്റിനൊപ്പമെങ്കിലും
ഒരു മൗനം കൊടുത്ത് വിടണം..!!
-----------------------------
നീയും ഞാനും
ചുംബനക്കാടുകളുടെ
രണ്ടതിരുകള്‍
------------------------
ഏതൊക്കെ
നീരൊഴുക്കിലേക്ക്
ഒഴുകിപ്പോകിലും
നിനക്ക് വന്നടിയാന്‍
ഈ കരമാത്രം
---------------
ഓര്‍ത്തിരിക്കുന്ന
വഴിയിലൊരു
മറവിമരം നടണം
---------------------
നീ വരുമെന്ന്
കോര്‍ത്തുവെച്ച
സങ്കടകുമിളകള്‍..!!
-------------------------
മറവിയുടെ ചിതലുകള്‍
നിന്റെ ഓര്‍മപുസ്തകം
തിന്ന് തീര്‍ക്കും മുന്പേ
മനമൊന്ന് കുടയുക നീ
ഞാന്‍ ബാക്കിയാവട്ടെ..!!
----------------------------
നീയെവിടെ എന്നാരായാൻ
എനിക്ക് ഞാനേയുള്ളൂ
----------------------------
നീ പെയ്യായ്കയാൽ
അത്രയും വേദനപൂക്കുന്ന
മരമാണ് ഞാന്‍
------------------------
ഒരു വാതില്‍ പഴുതിനും
ഇട നല്‍കാതെ
അടച്ച മുറികളിലും
നീ നിറഞ്ഞിട്ടുണ്ട്..!!
----------------------------
ഉപേക്ഷിച്ചത്
പറഞ്ഞു പോവണം
കയ്യിലുണ്ടായിരിക്കുമെന്ന്
വെറുതെ ധരിച്ച് പോവും
-----------------------
വാക്കുകളുടെ
അമ്പുകൊണ്ട് വീണതേയില്ല
മൗനം കൊണ്ടിങ്ങിനെ
പിടയുന്നതല്ലാതെ..!!
----------------------
ഇനിയും പുലരാത്ത
രാവിന്‍റെ ചെരിവുകളില്‍
ഒരൊറ്റമൈന
കാത്തിരിക്കുന്നു..!!
----------------------------
നിന്റെ മൗനത്തിനും
കടലിനും ഒരേ ആഴം
-------------------------
നിനക്ക് നിന്നെ
അറിയുന്നതിനേക്കാള്‍
എനിക്ക് നിന്നെ അറിയാം..!!
--------------------------------------
അപ്പോഴോക്കെ
നിനക്ക് ഞാനൊരു
ഓര്‍മത്തെറ്റായിരുന്നു..!!
----------------------------------
ഇപ്പഴും ഇടയ്ക്കിടയ്ക്ക്
ഞാനാവഴിയടച്ച
തെരുവിലേക്ക്
എത്തി നോക്കാറുണ്ട്
...
അത്രയും വേദനകള്‍
കോരിക്കുടിക്കാറുണ്ട്
----------------------------------
കളഞ്ഞു പോയതോ
കളവു പോയതോ
കാണാതായതോ
എന്തോ ഒന്നുണ്ട്
-------------------
ഞാന്‍ നീ മാത്രമായി
ഒറ്റപ്പെട്ടപ്പോള്‍
ഞാന്‍ ആശങ്കപ്പെട്ടിരുന്നേയില്ല
ലോകം മുഴുവന്‍ മറുപുറത്താണെങ്കിലും
നീ മാത്രം മതിയായിരുന്നു കൂടെ
...
ഇപ്പഴും നീ തനിച്ചാക്കിയിടത്ത്
ഞാന്‍ എന്നെ വിട്ട് പോവുന്നു
--------------------------------------
ഇനിയെത്ര മഴക്കാലം
പെയ്തു തോരണം
നിന്റെ മൌനമലിയുവാന്‍
--------------------------------
വേദനകളുടെ
സിരയറുത്ത്
നിന്റെ മൌനത്തിന്‍റെ
താഴ്വരയിലേക്ക്
ഞാനെത്രയോ തവണ
...
വീണ് മരിച്ചിരിക്കുന്നു,,,
---------------------------
ഏതഗ്നിയില്‍
ഉരുക്കി മാറ്റിയാലാണിനി
നിന്നെ എന്നില്‍ നിന്ന്
വേര്‍ തിരിക്കാനാവുക..!!
...
നിനക്ക് നിന്നെ
തിരിച്ചേല്‍പ്പിക്കാനാവുക..!!
----------------------------
നീ മഴ നനച്ചിട്ട
വേദനയോരം
----------------
ഓര്‍ത്തോര്‍ത്തിരിക്കേ
നിന്നെ പൊടുന്നനെ
എന്നില്‍ കാണാതായിരിക്കുന്നു..!!
--------------------------------
എന്റെ നിന്നോടുള്ള
പ്രണയത്തിന്റെ കടല്‍
ഞാനെത്ര തവണ
മുറിച്ച് കടന്നിരിക്കുന്നു
...
എന്നിട്ടും ഞാനിപ്പോഴും
നടുക്കടലിലാണ്..!!
-----------------------
ഞാന്‍ നീയെന്ന്
കോരിക്കുടിച്ച
സങ്കടച്ചാറുകള്‍
-------------------
നീ തിരിച്ച് വരുന്നില്ലെങ്കിലും
ചങ്ക് തുന്നുന്ന ഒരു സൂചി
ഇഴയടുപ്പമുള്ള സിരാനൂലുകള്‍
കൊടുത്തുവിടണം
...
നീയെടുത്ത്പോയ എന്റെ
പാതിചങ്കില്‍ മുറിവ് തുന്നാനാണ്
----------------------------
പ്രണയിക്കുക എന്നാല്‍
ചങ്കിലേക്ക് കവിതയുടെ
ഒരു തീതുള്ളി കുടഞ്ഞിടുക
എന്ന് കൂടിയാണ്..!!
--------------------------
മൗനങ്ങൾ പാകിയ
നിന്റെ പിന്മൊഴിയോരം
ശിലാരൂപമായൊരു
ഹൃദയം കാവലിരിക്കുന്നു..!!
-----------------------------
ഒരു കുഞ്ഞുവാക്കിന്റെ
തളിരു മതി
മൗനത്തിന്റെ തരിശുനിലമാകെ
പൂത്തുലയാൻ
-------------------
വിരഹത്തിലാവുമ്പോള്‍
മഴ നീയില്ലാത്ത
മുറിവുകളിലേക്ക് ചാറുന്നു
---------------------
മൗനം,
ശബ്ദം നിഷേധിച്ച
ഒരു കൂട്ടം വാക്കുകളുടെ
ആത്മാവാണ്..!!
----------------------
നിശബ്ദതയേക്കാള്‍ വലിയ ശബ്ദമില്ല..!!
----------------------------------
ഏതൊക്കെ
ഊടുവഴികളിലൂടെ
ചുരങ്ങളിലൂടെ
മുനമ്പിലൂടെ
താഴ്വാരങ്ങളിലൂടെ
...
നാട് കടത്തിയാലും
അടുത്ത നിമിഷം തന്നെ
തിരിച്ച് വരുന്നല്ലോ
നീയെന്
റെ വിഷാദത്തിന്‍
റെ
പൂച്ചക്കുഞ്ഞേ..!!
-------------------------------------
നീ
തിരിച്ച് നീന്താന്‍
പറ്റാത്തത്ര
ഉള്
കടലിലേക്ക്
എന്നെ നിന്‍
റെ കൂടെ
കൊണ്ട് പോവുന്നു
...
തോണിയും തുഴയുമില്ലാതെ
ഞാന്‍ ഉപേക്ഷിക്കപ്പെടുന്നു
ഞാനെത്രയോവട്ടം മരിച്ചിട്ടും
പിന്നെയും ബാക്കിയാവുന്നു..
---------------------------------
വഴിയിലൊരിക്കലും
നിന്നെ കാണാതിരുന്നെങ്കിൽ
എന്ന് പ്രാർത്ഥിച്ച്
വഴി നീളെ
നിന്നെ തിരയാറുണ്ട് ...
ഞാനിപ്പോഴും..!!
---------------------------------
നിന്റെ മൌനങ്ങള്‍
വിവര്‍ത്തനം ചെയ്യുന്ന
ഒരു മഹാമുനിയെ
അന്യേഷിക്കുന്നു ഞാന്‍
-------------------------------------
